Day 1 ✏ 香港 (Hong Kong) ✈名古屋 (Nagoya)

由於今次機票係redeem ticket所以book到嘅時間係非常之差，絕對係晚機去早機返，咁即係話八日行程頭尾已經冇咗兩日。喺整整六日嘅行程裏邊，其實都真係幾pack。不過好彩我哋決定自駕遊，所以時間都係由自己決定。之但係因為咁，由於中間有啲行程都要揸幾耐車，所以都非常之攰。

起飛時因為黑雨嘅關係，所以班機延遲，所以原本九點去到名古屋，到達時已經差唔多11點。由於時間都唔早，所以好趕地坐左十一點十五分班列車出名古屋，出到去酒店都已經差唔多12點。其實一心諗住就算九點幾去到都要食返餐好嘅，但係12點幾已經冇乜可以選擇，大部份都已經關門大吉。所以最後都係食咗一碗牛肉飯，早早返去酒店休息預備聽日嘅行程。

呢一晚由於只係草草瞓一晚，所以決定揀近名鐵嘅Meitetsu New Grand酒店。呢間酒店價錢一般(¥8,600)，房間乾淨度都係一般，但係至在夠方便，由名鐵站行去大概十分鐘。亦都因為離開租車公司只有五分鐘嘅路程，所以決定揀呢間。